«Мин ырыа кэһиилээх кэлиэҕим» Людмила Спиридоновна Максимова 80 сааһыгар ананар үбүлүөйнэй биэчэрэ.
Айылҕа барахсан күөҕүнэн киэркэйэн турар, сайыҥҥы күн муҥуутаан уһуур кэмигэр, 80 сыл аннараа өттүгэр Хачыкаат нэһилиэгэр Людмила Спиридоновна Максимова — Арассыйскай Федерация үлэ ветерана, Саха Өрөспүүбүлүкэтин үөрэҕириитин туйгуна, сыана бочуоттаах бэтэрээнэ, бу орто дойдуга күн сирин көрбүтэ. Бэс ыйын 9 күнүгэр «Сарыал» култуура киинигэр, ытык-мааны киһибит үөрүүлээх үтүө күнүгэр үөрүүтүн бииргэ үллэстэчугас дьонноро бары муһуннулар.
Людмила Спиридоновна ойор күннээх оҕо саас кэмнэрэ Кыһыл Үрүйэ нэһилиэгэр ааспыта. 8-с кылаас кэнниттэн Дьокуускай куоракка 1-кы нүөмэрдээх педучилищеҕа музыкальнай отделенияҕа үөрэммитэ. Педагогическай үлэтин 1969 с. төрөөбүт нэһилиэгэр Хачыкаат орто оскуолатыгар үлэлээн саҕалаабыта. Ол саҕана оскуолаҕа 500-чэкэ оҕо үөрэнэр этэ. 1 кылаастан 7-с кылааска диэри 300-кэ оҕону ырыаҕа үөрэтэрэ. Людмила Спиридоновна оскуолаҕа уруок ыытарын таһынан художественнай самодеятельноска, фестивалларга бары кылаас оҕолорун бэлэмнээн, пианиноҕа доҕуһуоллаан ыллатар, үҥкүлэтэр эбит. Оскуолаҕа 1988 с. диэри үлэлээбит, ол сыл күһүнүгэр «Куоласчаан» оҕо уһуйааныгар музыка салааччытынан үлэлии киирбитэ. «Куоласчааҥҥа» 2016 с. диэри үлэлээбит. Бу сыллар тухары музыка араас хайысхатынан үлэлээн ааспыта. Ол курдук араас ырыалары, үҥкүүлэри, олоҥхолору, остуоруйалары, нууччалыы, сахалыы народнай ырыалары, частушкалары, сценкалары, операны кытта иитиллээччилэригэр үөрэтэн кэлбит. Салгыы баран иһэн Людмила 2017 сылтан нэһилиэк общественнай үлэтиттэн туора турбакка «Чэбдик» эбээлэр түмсүүлэрин активнай кыттааччыта буолар.
Эҕэрдэ тылларын эттилэр:Хачыкаат нэһилиэгин тыа сирин түөлбэтин баһылыгын солбуйааччыта Сардана Петровна Ефимова, үөлээннээҕэ Светлана Еремеевна Горохова, Хачыкаат орто оскуолатын коллектива, Александра Ивановна Ефремова, «Сарыал» култуура киинин директора Галина Гаврильевна Игнатьева, «Куоласчаан» оҕо уһуйаанын коллектива, «Чэбдик» түмсүү салайааччы Светлана Михайловна Петрова, Хачыкааттааҕы ветераннар сэбиэттэрин салайааччытынан үлэлээбит Альбина Прокопьевна Софроняева, Хачыкааттааҕы «Санаа сылааһа» ветераннар сэбиэттэрин салайааччыта Роза Николаевна Шадрина, балта Надежда Николаевна Новгородова, Дарья Гавриловна Константинова уонна юбилярша оҕолоро, сиэннэрэ.
Үбүлүөйдээх кэрэ киһибитин Людмила Спиридоновна олорон ааспыт 80 сылын анааран көрдүбүт, өссө да ааҕыллар олуктар эбиллэ турдуннар диэн алгыс тылларын этэбит!
