🙌🌿Кыһыл Үрүйэ нэһилиэгин Үрүн Тунах Ыһыаҕа
Бэс ыйын13 күнүгэр Кыһыл Үрүйэҕэ саламаннан симэммит, чэчиринэн чэлгийбит, уйгу-быйан олбохтоох, үөрүү көтүү үктэллээх Арассыыйа норуоттарын сомоҕолоһууларын, Саха Өрөспүүбүлүкэтигэр култуура, Хаҥалас улууһугар сомоҕолоһуу уонна айан-тутан түмсүүлээх буолуу , Кыһыл Үрүйэҕэ үөрэхтээһин тэриллибитэ 85 сылынан, Саха норуотун уус-уран баайын чыпчаала буолбут улуу Олоҥхобут аһаҕас халлаан анныгар турбута 90 сылыгар үрүн тунах ыһыахпыт буолан ааста.
Күн санаа көччүйдүн диэн өбүгэлэрбит үйэлээх үгэстэринэн түптэ буруотунан унаарытан , ситимин тардан, үгэс быһыытынан олохтоох алгысчыт Владимир Мартынович Герасимов былыргыттан тэнийэн кэлбит сиэри тутуһан,сайыны уруйдаан арчылаах алгыһы түһэрдэ.. Людмила Спиридоновна Максимова алгыс оһуохайы таһаарда.
Үрүҥ тунах ыһыаҕынан Хачыкаат нэһилиэгин баһылыга Ирина Викторовна эҕэрдэ тыл эттэ.
Саха норуотун тылынан уус-уран чыпчаала буолбут улуу Олоҥхону Кыһыл Үрүйэҕэ куруһуок тэрийэн төрүттээбит улуу олоҥхоһуттарбытын ааттарын ааттаан ахтан санаан аастыбыт. Ол кэннэ кэнчээри ыччаппыт Хачыкааттан Дима Сулейманов «Модун эр Соҕотох”, Кыһыл – Үрүйэттэн “Үрүйэчээн” театральнай куруһуок оҕолоро, салайааччы Людмила Артамонова “Ойор тэбэр аттаах Оҕо Бочоох бухатыыр”, Хачыкааттан сыана бэтэрээнэ Николай Максимов “Ньургун Боотур” олоҥхоттон Сорук Боллур оруолун толорон дьон биһирэбилин ыллылар.Олохтоохтор уонна Кыһыл –Үрүйэттэн төрүттээхтэр концерт көрдөрдүлэр бииртэн биир кэрэ куоластаах ырыаһыт кыргыттар, нэһилиэк “Сарыал” үҥкүүһүт Далбардара, үүнэр күлүөнэ ыччаттарбыт ыллаан туойан сайыны уруйдаатылар, айхаллаатылар. Олохтоох кыргыттарбыт Лилия Федорова (Прокопьева) дьүрүлэ, Дыдаев тылларыгар « Өр сыллаах ахтылҕаным» , Надежда Лиханова тылларыгар,Лилия Федорова дьүрүлэ “Дьүөгэлэрбэр”, Аркадий Протодьяконов тылларыгар, Андриан Егоров дьүрүлэ «Кыракый уолчааным», ыалдьыппыт Байдам Дайыына Сииҥкэ кыыһа тылларыгар, Елена Ильина- Намчы «Ситиһии табыллыы тарыйдын» диэн саҥа ырыалар ылланан дьон биһирэбилин ыллылар.
Үгэс быһыытынан “Саха мааны таҥаһа”, “ Оһуордаах оһуохай үҥкүүтэ”, спортивнай оонньуу күрэхтэрэ уонна олус күүтүүлээх Кыһыл –Үрүйэҕэ үөрэхтээһин тэриллибитэ 85 сылынан, оскуола лоторея оонньотон дьон сүргэтэ көтөҕүллэн, өттүк харалаах, илии тутуурдаах тарҕастылар.
