Ыһыах 2025
Самаан сайын салаллаан кэлбитинэн Саха ытык күнүнэн! Улуу уйгу ыһыаҕынан! Уруй! Айхал! Арассыыйаҕа Аҕа, Саха Өрөспүүбүлүкэтигэр Ийэ дойдуну көмүскээччи , Хаҥалас улууһугар Кыайыы уонна Эйэ сылларыгар аналлаах бэс ыйын 24 күнүгэр Хачыкаат нэһилиэгин 2025 сыл самаан сайыны көрсөр Үрүҥ Тунах ыһыаҕа буолан ааста. Аҕыс иилээх саҕалаах аан ийэ дойдум, айгыр силик айылҕата муҥутаан сайдар кэмигэр аар хатыҥ барахсан солко күөҕүнэн сууланар, үтүөкэннээх бэс ыйыгар биһикпитин бигээбит төрүт үтүө дойдубут, түөлбэ дьонноро мустан бастыҥ бырааһынньыгы ыһыаҕы алгыс оһуохайынан ылыы туойа көрүстэ. Эллэй эһэбит амалыйан, уйгубутун уһаппытын, төҥнүбэт төлкөбүтүн түстээбитин үйэтитээри, ас кээспит сиэрбитин ситэрэн, туомун тутуһан Арчылаан ыраастаан аастылар. Төбүрүөннээн түмсүбүт түөлбэ күөлгэ маарыннаах төгүрүк түһүлгэбитигэр үҥэр-сүктэр Айыыларбыт тохтоон аастыннар, ыраас санаа олохсуйдун, күн санаа көччүйдүн диэн өбүгэлэрбит үйэлээх үгэстэринэн түптэ буруотунан унаарытан, ситимин тартылар. Сыһыы Баһын түһүлгэтигэр түҥ былыргыттан тэнийэн кэлбит сиэри тутуһан, сайыны уруйдаан арчылаах алгыһы түһэрдэ РФ үтүөлээх механизатора, Хачыкаат нэһилиэгин бочуоттаах олохтооҕо Роман Михайлович Куприянов. Алгыс оһуохайын таһаарда эдэр эрчимнээх оһуохайдьыт Михаил Адамов. Быйыл саха ырыатын – тойугун, үҥкүүтүн – битиитин, оһуохайын 20 үйэҕэ киэҥник тарҕаппыт, саҥа кэмҥэ сүтэн хаалбатыгар сүҥкэн кылаатын киллэрбит Сергей Афанасьевич Зверев – Кыыл Уола төрөөбүтэ 125 сыла. Ыһыах түһүлгэтигэр мустан бар дьоммут, сүһүөхтэригэр туран “Оһуор” үҥкүүтүгэр олоҕуран “Тоҕус мэҥэ хамнаныылары” тэбис тэҥҥэ хамсаныылары оҥордулар. Буойуннар албан ааттарын, гражданскай эр санааланыыны бэлиэтиир кыайыыга аналлаах ыһыаҕынан эҕэрдэлээн туран Кыайыы 80 сылыгар ананар “Кыайыы вальсынан” эҕэрдэлээтилэр “Сарыал” үҥкүү коллектива. Үрүҥ Тунах ыһыаҕынан Хачыкаат нэһилиэгин баһылыга Ирина Викторовна Оболкина эҕэрдэ тыл эттэ.
Хачыкаат нэһилиэгин улэһит дьоно!
Үтүөнү өрөгөйдүөҕүн!
Бастыҥы барҕардын!
Үйэлээҕи үксэтин,
Өйдөөҕү тэнитин,
Кэрэни кэккэлэтин!
Үс саха үөрүүтүнэн
Саһарҕаны ыллатын!
Үрүҥ тунах ыһыаҕынан, доҕоттор!
Ыһыах күөн-күрэстэрэ:
