Самыртай оһуохайа
Олунньу 28 күнүгэр Хачыкаатка «Сарыал» култуура киинигэр «Самыртай оһуохайа» диэн улахан бэрт сэргэх, кэскиллээх тэрээһин буолан ааста. Бу тэрээһиҥҥэ «Ытык оһуохай», Аар Айыы итэҕэл алгысчыттара, «Айгы ситимэ» өрөспүүбүлүкэтээҕи түмсүүлэр кэлэн ыалдьытаан бардылар.
Тэрээһин сүрүн көҕүлээччитэ Хаҥалас улууһун ll Малдьаҕар бочуоттаах олохтооҕо, анал байыаннай дьайыы кыттыылааҕа «Саха Боотур» диэн уол оҕолору эт — хаан өттүнэн эрчийэр, дойдуга бэриниилээх буоларга иитэр уһуйаан салайааччыта Андрей Юльевич Артамонов — Малдьаҕар Бөртө буолар.
Сыала-соруга Хаҥалас улууһугар оһуохайы сайыннарыы уонна киэҥ эйгэҕэ тарҕатыы. Оһуохай түмэр суолталааҕын ыччаттарга тириэрдии.
Хаҥалас улууһун Покровскай куорат «Арчы дьиэтин» норуот айымньытын киинин салайаачыта, Саха
Өрөспүүбүлүкэтин култууратын үтүөлээх үлэһитэ Лидия Васильевна Харитонова арчылаата, ыраастаата.
Аар Айыы итэҕэл алгысчыта Андрей Дмитриевич Скрябин алгыс сиэрин туомун
ыытта.
Үгэс быһыытына сиэр — туом кэннэ алгыс оһуохайын «Ытык оһуохай» түмсүү салайааччытын солбуйааччыта Дархан этээччи Марта Тимофеевна Николаева тэтимнээх, эрчимнээх күүстээх куолаһынан саҕалаан, «Ытык оһуохай» түмсүү чилиэннэрэ Хорунов Валентин Васильевич, Иванова Мария Марковна, Бассанова Мария Степановна, Егоров Аскалон Лукич, Герасимова Аграфена Семеновна этэн тыынан бары кэлбит ыалдьыттар оһуохайы оройуттан туттулар.
Хаҥалас улууһугар оһуохай сайдарын туһугар анаммыт төгүрүк остуолга кэлбит ыалдьыттар бары санааларын үллэстэн, олус дириҥ ис хоһоонноох кэпсэтии, ырытыһыы кэннэ аны Эркээни хочотугар муус устар ый бүтүүтэ оһуохай киэһэтин ыытарга бары биир санааҕа кэллилэр.
Оһуохай оонньуулаах Сахабыт күн эргиир оонньуута ыраахха дылы сатарыйдын, дуорайдын.
